ທະນາຄານ ໄຊງ່ອນເທືອງຕິ່ນ ລາວ ຈໍາກັດ (Sacombank Lao) ແມ່ນທະນາຄານ ທີ່ຂຶ້ນກັບ Sacombank (Vietnam), ເຊິ່ງມີສິດດ້ານນິຕິກໍາ ແລະ ການລົງບັນຊີທີ່ເປັນເອກະລາດ.
ຜ່ານໄລຍະເວລາ 10 ປີ ແຫ່ງການສ້າງຕັ້ງ Sacombank Lao ໄດ້ມີການຂະຫຍາຍຕົວຂຶ້ນ ເຊິ່ງມັນສະແດງອອກ ດ້ວຍຈໍານວນຕົວເລກທີ່ກ້າວກະໂດດຂັ້ນ. ຊັບສິນລວມ ທັງໝົດ ນັບແຕ່ປີ 2008 ຈົນມາຮອດປັດຈຸບັນ ແມ່ນມີອັດຕາເພີ່ມຂຶ້ນ 11 ເທື່ອ ແລະ ການລະດົມທຶນ ເພີ່ມຂຶ້ນ 11 ເທື່ອ ພ້ອມກັບການຮ່ວມມື, ສະໜອງທຶນໃຫ້ແກ່ບັນດາຫົວໜ່ວຍ ວິສາຫະກິດ ຂອງ ລາວ ກໍຄື ຫວຽດນາມ ທີ່ດໍາເນີນທຸລະກິດຢູ່ລາວ. ປັດຈຸບັນ, Sacombank Lao ໄດ້ມີການຂະຫຍາຍເຄືອຂ່າຍບໍລິການ ລວມມີ: ສໍານັກງານໃຫຍ່ ແລະ 4 ສາຂາ ຄື: ສາຂາ ນະຄອນຫຼວງ, ສາຂາ ທາດຫຼວງ, ສາຂາ ຈໍາປາສັກ ແລະ ສາຂາ ສະຫວັນນະເຂດ.
ໃນວັນທີ 12/12/2018 Sacombank Lao ໄດ້ຈັດງານສະເຫຼີມສະຫຼອງ ວັນສ້າງຕັ້ງ ທະນາຄານ ຄົບຮອບ 10 ປີ ທີ່ ໂຮງແຮມ Moung Thanh Luxury Vientiane, ເຊິ່ງເປັນກຽດເຂົ້າຮ່ວມງານໃນຄັ້ງນີ້ ໂດຍມີ ທ່ານ ສອນໄຊ ສິດພະໄຊ ຮັກສາການຜູ້ວ່າການທະນາຄານ ແຫ່ງ ສປປ ລາວ, ທ່ານ ສົມດີ ອິນມີໄຊ ຜູ້ຊ່ວຍຄະນະນໍາກະຊວງ / ຜູ້ອໍານວຍການກອງທຶນ SME, ທ່ານ Nguyen Thanh Tung ຮອງເອກອັກຄະລັກຖະທູດຫວຽດນາມ ປະຈໍາລາວ, ທ່ານ Duong cong minh ປະທານສະພາບໍລິຫານ Sacombank (Vietnam), ຄະນະບໍລິຫານ Sacombank Lao ແລະ ບັນດາແຂກຜູ້ມີກຽດ. Sacombank Lao ຍັງໄດ້ມີການມອບຂອງຂວັນໃຫ້ກັບພະນັກງານ ແລະ ລູກຄ້າ ທີ່ຢູ່ຄຽງຄູ່ກັບ Sacombank Lao ນັບແຕ່ມື້ວັນສ້າງຕັ້ງ ມາເຖິງປັດຈຸບັນ.
ໃນຂະນະດຽວກັນ, Sacombank Lao ຍັງໄດ້ມອບລາງວັນພິເສດ ໃຫ້ກັບລູກຄ້າທີ່ໄດ້ຮັບລາງວັນໃຫຍ່ທອງຄໍານໍ້າໜັກ 25 ບາດ ຈາກລາຍການ “ແຈກທອງຄໍາ ສະຫຼອງຄົບຮອບ 10 ປີກັບ Sacombank Lao”, ເຊິ່ງຜູ້ໂຊກດີ ໄດ້ແກ່: ທ່ານ ນາງ ແສງເດືອນ ແກ້ວກຸນນະວົງ, ປັດຈຸບັນຢູ່ບ້ານ ຄໍາແປງ, ເມືອງ ຊະນະສົມບູນ, ແຂວງຈໍາປາສັກ.
ການຈັດງານໃນຄັ້ງນີ້ໄດ້ກາຍເປັນຂີດໝາຍໃນການເຕີບໃຫຍ່ຂະຫຍາຍຕົວ ແລະ ເປັນບາດກ້າວສູ່ຄວາມສໍາເລັດໃນຕໍ່ໜ້າ ຂອງ Sacombank Lao. ເນື່ອງໃນໂອກາດອັນມີຄວາມໝາຍມສໍາຄັນນີ້, ທາງ Sacombank Lao ຂໍສະແດງຄວາມຂອບໃຈມາຍັງບັນດາພະນັກງານທີ່ໄດ້ພ້ອມກັນເຮັດວຽກ ກໍຄືໄດ້ສຸມໃສ່ໃນການພັດທະນາທະນາຄານ ແລະ ສິ່ງສໍາຄັນທີ່ສຸດ ແມ່ນ ຂໍສະແດງຄວາມຮູ້ບຸນຄຸນມາຍັງບັນດາລູກຄ້າທີ່ໄດ້ຢູ່ຄຽງຂ້າງ ແລະ ເຊື່ອໝັ້ນໃນການບໍລິການ ຂອງ Sacombank Lao ຕະຫຼອດມາ. ດັ່ງນັ້ນ Sacombank Lao ຈະຂໍສືບຕໍ່ປະຕິບັດໜ້າທີ່ຂອງຕົນ ແລະ ບໍ່ຢຸດທີ່ຈະຄົ້ນຫາຜະລິດຕະພັນໃໝ່ໆ ພ້ອມທັງ ຍົກສູງມາດຕະຖານການບໍລິການໃຫ້ທຽບເທົ່າກັບສາກົນ, ໃຫ້ສົມກັບຄວາມໄວ້ເນື້ອເຊື່ອໃຈ ຂອງບັນດາລູກຄ້າທີ່ມີໃຫ້ກັບ Sacombank Lao ຕະຫຼອດມາ.
